DESA WISATA RAJADATU NGARUMAT SENI TRADISI

Ku : Agus Gunawan, SPd.

Ari anu dimaksud Desa Wisata nyaéta Desa anu jadi pangjugjugan wisatawan kusabab miboga magnét ( daya tarik ) anu aya di éta wewengkon.

Desa Wisata payung hukumna nyaéta undang-undang no.15 taun 2019 . Ari tujuan ayana Desa Wisata diantarana ngabantu program pamaréntah dina widang obyek wisata alternatip, ngagali potensi wisata anu aya di Desa, ngurangan Urbanisasi, nyieu lapangan pagawéan anyar, miboga rasa reueus ku kamajuan Desana, ngaraketkeun silaturahmi antara pribumi jeung pabuaran, ningkatkeun ékonomi masyarakat ku cara dagang hasil kebon, hasil tatanén, hasil perikanan, peternakan, dagang kuliner kearipan lokal, dagang karajinan tangan, mintonkeun seni budaya tradisional lokal, jeung nuséjéna.

Lamun Desa Wisata hayang maju kudu nerapkeun Sapta Pesona, nyaéta AMAN, TERTIB, BERSIH, SEJUK, INDAH, RAMAH, jeung KENANGAN dina kahirupan sapopoé di Desa Wisata.

Desa wisata mah Desa anu nyuguhkeun kaayaan asli Desa, saperti kahirupan sapopoé, ékonomi, pakasaban, adat istiadat, jeung wawangunan imah asli di padesaan.

Lamun hiji Desa hayang jadi Desa Wisata, aya 7 léngkah anu kudu dilakonan. Nyaéta mimitina kudu nyieun pemetaan potensi Desa, tuluy ngalibatkeun masyarakat jeun intansi terkait, ngrarancang jeung ngembangkeun inprastruktur, ngembangkeun produk jeung pengalaman wisata, pemasaran jeung promosi Desa Wisata, pengelolaan dan keberlanjutan, jeung pangwangunan Desa Wisata disagala widang.( wikipedia )

Dina tanggal 21 Oktober 2023 di Lapang Sepak Bola Desa Rajadatu diayakeun hiji kagiatan Pentas Seni jeung Kirab barang-barang Kuno titinggal Karajaan Galuh anu sumebar di masyarakat Desa Rajadatu anu nyandak jejer Pekan Kreativitas dan Apresiasi Tradisi ( PEKAT ) anu dialpukahan ku Lembaga Budaya Yayasan Putra Santana Mandiri Desa Rajadatu.

Kagiatan ieu dina raraga Milangkala Desa Rajadatu anu Ka- 102 taun.

Panatacalagara kagiatan Milangkala Desa Rajadatu Hélmi Hérliana masihan katerangan ka Sunda Midang dina acara PEKAT Pagelaran Gebyar Seni jeung Kirab Benda Pusaka di Lapang Santana Desa Rajadatu.

" Alhamdulillah, Desa Rajadatu tiasa ngawujudkeun acara Pekan Kreativitas Apresiasi Tradisi ( PEKAT ) ku ngayakeun Gebyar Seni sareng Kirab Benda Pusaka patitingal Kerajaan Galuh tiasa kalaksanakeun kalayan lancar. Simkuring atasnami Panatacalagara nganuhunkeun ka Bapa Sekdisdikbud sareng ka Ibu kabid kebudayaan ti Disdikbud oge ka pendamping desa wisata Kabupaten Tasikmalaya anu parantos tiasa hadir nedunan pangulem simkuring saparakanca. Ngahaturkeun nuhun ogé ka unsur Muspika Kecamatan Cinéam Bapa Camat, Bapa Danramil, kalih Bapa Kapolsek. Ogé hatur nuhun kana kasumpinganana ka Bapa Kades Rajadatu, Kades Madiasari, Kades Ancol, Kades Cinéam, Kades Cijulang, Kadés Cikondang, Kades Pasirmukti, Kades Cisarua, Kades Ciampanan, Kades Nagaratengah, Kades Citalahab, Kades Sirnajaya, sareng Kades Karanglayung.

Teu hilap ogé ka Lingkung Seni ti dua Kacamatan, ti Kacamatan Cinéam sareng Kacamatan Karangjaya, anu parantos ngarojong acara ieu ku nyumpingkeun rupi-rupi kasenian Tradisional sapertos Pencak Silat, Reog, Kuda Lumping, Calung, Barongsay, Dongkol, Angklung, Ronggéng gunung, Lais, Wayang Golék, Sisingaan, Jaipongan, Kacapi Suling sareng nusanésna

Lingkung Seni sareng Padepokan anu tiasa hadir aya 20, nyaéta Lingkung Seni Putra Pusaka Bakti Desa Pasirmukti, Padépokan Darma Putra Saluyu Desa Madiasari, Padépokan Pusaka Karuhun Desa Cinéam, Lingkung Seni Karya Bakti Desa Ciampanan, Padépokan Pajar Bakti Jaya Saputra Desa Cisarua, Padépokan Djanggadipa Desa Madiasari, Lingkung seni Panjiboma Desa Ancol, Padepokan Putra Kiara Desa Karangjaya, Lingkung Seni Pancar Ligar Desa Sirnajaya, Lingkung seni Calung Kombinasi Gentra Pangguar Rasa Desa Rajadatu, Lingkung seni ibing tayub Mekar Budaya Bakti Desa Ciampanan, Padepokan Jaya Pusaka Desa Karangjaya, Padepokan Dangiang Pusaka Sukapura Desa Ciampanan, Padepokan Putra Jagat Desa Cikondang, Padepokan Satria Maung Lugay Desa Ciampanan, Padepokan Pusaka Kampung Baru Desa Cikondang, Paguyuban Tosan Aji Panji Bongsar Desa Cineam, Padepokan Putra Panggugah Rasa Desa Citalahab, Lingkung Seni Putra Santana Desa Rajadatu, Lingkung Seni Pusaka Mekar Budaya Desa Karanglayung.

Teu kakantun nganuhun ka Paguyuban Tosan Aji Panji Bongsar, Musium anu ngarumat barang-barang Pusaka patitingal Kerajaan Galuh anu ngiring ngarojong acara Milangkala Desa Rajadatu ku mintonkeun pakakas sareng barang-barang Kuno sapertos Keris Pusaka Sagaluh, Keris Papayung Desa Rajadatu, Mahkota, sareng benda Kuno sanésna.

Desa Wisata Rajadatu anu diistrénan janten Desa Wisata ku Bupati Tasikmalaya kalih Disparpora kabupaten Tasikmalaya, miboga kearipan lokal conto dina widang kasenian aya lingkung seni anu ngamumulé jeung ngarumat seni tradisional nyaéta Pencak Silat, Calung, Kuda Lumping, Sisingaan, Kacapi Suling, sareng nusanésna. Dina widang pertanian ogé warga tos ngabudidayakeun gedang Kalifornia, cabé, kangkung, paré, saledri, salada, sareng nusanésna. Dina widang perikanan warga tos nyoboan melak lauk lélé sareng jaér ku sistim bioflok. Dina widang UMKM warga Desa Rajadatu ngadamel kerajinan alat kesenian calung, ngadamel bésék pipiti, ngadamel kué kering/ kué basah, opak, home industri munuman honjé, minuman herbal téh Bunga Telang, budidaya madu teuweul, sareng nusanésna. Ogé Di Desa Rajadatu parantos produksi kerajinan Batik Rajadatu, sok sanaos masih léléngkahhalu namun pemasaran/ pesanan ngeureuyeuh.

Perkawis obyek wisata unggulan lokal, ayeuna nuju dikembangkeun obyek wisata Bukit Sumingkir, sareng Arena Adrenalin Sepeda Gunung ngurilingan Desa Rajadatu ti ngawitan jalan aspal, jalan taneuh, jalan babatuan, jalan bécék, sareng jalan anu nguji kawani, dipungkas ku susuguh Sangu Liwet Has Rajadatu. Sinareng rencana tahun 2024 bade muka pasar mingguan anu di meriahken ku rupi-rupi pentas seni sareng bazar-bazar UMKM.

Kamajuan Desa Rajadatu teu leupas tina pangrojong masyarakat, karancagéan perangkat Desa, sareng kaparigelan Badan Usaha Milik Desa ( Bumdes ) SANTANA anu dikokolakeun ku Dadang Noor Iskandar ( Direktur ), Pria Natakusumah, SPd ( Sekretaris ), Ii Taufik Rakhman, S.HI ( Bendahara ), Bahri Arifin ( Pengawas ), Drs.Tatang Somantri ( Pengawas ), Bayu Azis Nugraha, ST ( Pengawas ).

Widang usaha Bumdes Santana Rajadatu diantawisna EDC BRI Link, Kolam Pemancingan, Kebun Pepaya, Ternak Ayam, Perikanan Mujaér, Ternak Domba, Mesin Aduk, PAM Pusakamukti, Industri Batik, Warung Rental, Toko Sparepart, UMKM, Budidaya Cabé Rawit, Budidaya Palawija, BRI Link, Budidaya Ayam Petarung, Sarana Olahraga, Sewa Kursi, sareng anu sanésna.

Harepan pikeun generasi muda, teu nanaon urang lunta ka Kota pikeun néangan élmu jeung pangalaman, tapi kudu inget ka lembur, kudu ngamajukeun sarakan tempat kalahiran urang, ku cara nerapkeun élmu jeung pangalaman anu geus sukses, supaya Desa urang bisa maju saperti Desa-desa sejenna, sapertos Desa Taraju anu kengging Juara Desa Wisata tingkat Nasional taun 2023, atanapi Desa Cisayong, sareng Desa wisata sanésna anu tos maju. Harepan simkuring saparakanca ka Pamarentah daérah, supados tiasa ngabantos masihan pasilitas anu diperyogikeun ku warga Desa Rajadatu, sapertos akses jalan sareng ngabantos dina widang pemasaran hasil kerajinan/pertanian/ perikanan/ peternakan, sareng masihan kasempatan kanggo Lingkung Seni tandang makalangan di tingkat Kabupaten atanapi Provinsi.

Sumangga ka wisatawan anu panasaran hoyong uninga Desa Wisata Rajadatu sareng ka para investor atanapi pengusaha anu maksad ngiring ngarojong kamajengan Desa Wisata Rajadatu, diantos kasumpinganana, namung sateuacan sumping saéna kontak heula ka no HP/ WA POKDARWIS 0823 9757 5750.

Helmi Herliana Ketua Kelompok Sadar Wisata ( Pokdarwis ) Desa Rajadatu masihan katerangan ka Sunda Midang sakantenan promosi, disarengan ku Adé Farid Rahmatilah ( sekretaris ), sareng Ima Anisa Utami ( bendahara ).